Clì Gàidhlig

guth luchd-ionnsachaidh

buidheann cothruim is adhartachaidh na gàidhlig

Cùrsaichean Chlì Gàidhlig

Bidh sinn a’ cumail chùrsaichean còmhraidh aig diofar ìrean air feadh na h-Alba, mar is trice aig ceann na seachdain. Cuideachd cumaidh sinn cùrsaichean nas fhaide, suas gu còig làithean, a rèir iarrtais.

’S ann spòrsail a tha iad ’s an cudrom air còmhradh. Gheibh luchd-ionnsachaidh deagh theagasg bho thidsearan fiosrachail, is bidh cothrom aca coinneachadh ri luchd-ionnsachaidh eile sa sgìre.

Bidh sinn a’ teagasg chùrsaichean aig na h-ìrean a leanas:

• A’ Chiad Cheum (fìor luchd-tòiseachaidh)
• Ceum air Adhart (eadar-mheadhanach ìosal)
• Coiseachd Ort (eadar-mheadhanach àrd)
• Ruith gu Luath (adhartach)

Nuair a tha thu a’ smaoineachadh air cùrsa a dhèanamh, tagh an ìre far am fairich thu comhfhurtail ach rud beag air do shìneadh. Tha na clasaichean sùbailte, agus tha cothrom agad gluasad gu ìre eadar-dhealaichte ma thogras tu.

Cùrsaichean Chlì air Faire:

A bheil thu airson dhol air cùrsa? – clioc air Glèidh àite.

Tha manaidsear nan cùrsaichean, Seonag Anderson, toilichte cùrsaichean a chur air dòigh air feadh na h-Alba (no Sasainn) ma tha iarrtas gu leòr ann. Mas aithne dhut luchd-ionnsachaidh gu leòr anns an sgìre agad a bhiodh airson cùrsa a fhrithealadh, cuir fios gu seonag@cli.org.uk, no cuir fòn gu 01463 226710

Good learning, good fun and good company – the tutor was great.”

“The best Gaelic course I have attended –excellent.”

Prìsean

Cùrsa Gràmair
Tha sinn a’ tabhann cùrsa gràmair dian, 3-5 làithean, do dh’fhileantaich agus luchd-ionnsachaidh adhartaich. Thèid an cùrsa seo a theagasg leis an fhear-naidheachd ainmeil, Ruairidh MacIlleathain. Bidh Ruairidh a’ teagasg gràmar do luchd-craolaidh agus a’ sgrìobhadh Litir do Luchd-ionnsachaidh gach seachdain. ’S urrainn do dh’fhileantaich agus luchd-ionnsachaidh adhartach greim nas fheàrr fhaighinn air gràmar na Gàidhlig agus na sgilean riatanach airson obair ann an saoghal na Gàidhlig a leasachadh.

Aire air Gàidhlig

Air sgàth ’s gun tug Achd na Gàidhlig dleastanasan ùra do bhuidhnean poblach gus a’ chànain a bhrosnachadh, tha e nas riatanaiche gu bheil luchd-obrach nas eòlaiche air buannachdan na Gàidhlig. Bidh Clì a’ toirt seachad “Là Gaelic Awareness” airson bhuidhnean agus daoine air leth a tha airson barrachd ionnsachadh air a’ Ghàidhlig agus a h-ath-nuadhachadh.Bidh an cùrsa seo gad shealltainn carson a tha Gàidhlig cho cudromach ann an Alba agus ciamar as urrainn dhut:

• “Ciamar a tha thu?” fhuaimneachadh
• ainmean-àite Gàidhlig a leughadh agus a thuigsinn
• innse do neach-turais cò às a thàinig a’ Ghàidhlig

Please phone Clì to book the Gaelic Awareness Days

Buidhnean Còmhraidh

Tha buidhnean còmhraidh air leth freagarrach airson luchd-ionnsachaidh a tha airson an Gàidhlig a chleachdadh ann an suidheachadh neo-fhoirmeil. Gheibhear barrachd fiosrachaidh air ciamar a chuireas tu buidheann còmhraidh air bhonn bho D J MacIntyre, Stiùiriche Chlì Gàidhlig:dj@cli.org.ukno fòn 01463 226710.

Thèid cearcall-còmhraidh a chumail airson fhileantach ’s luchd-ionnsachaidh a h-uile Disathairne eadar 10.00 agus 12.00 ann an Leabharlann Poblach Chùil Lodair, Rathad a’ Cheapaich, Cùil Lodair.